སྤེལ་མཁན། : tsenrig 7/31/2013



དེང་དུས་ཚན་རིག་པ་སོགས་ཤེས་ཡོན་མི་སྣ་ཙམ་མ་ཡིན་པར་ཚོང་པ་དང་ཆབ་སྲིད་མཁན་ཚོས་ཀྱང་སྒོམ་སྒྲུབ་ཉམས་བྱེད་ཚུལ་དང་བྱས་ན་ཕན་ཐོགས་ཡོད་ལུགས་ཤོད་པ་ཐོས་རྒྱུ་ཡོད་ལ། སྒོམ་གྱི་ཕན་ཡོན་ལ་བརྟེན་ནས་ཚོང་པ་ཡག་པོ་ཞིག་ཇི་ལྟར་དང་དེའི་ཐོག་ནས་ཚོང་གི་ཁེ་བབ་མང་ཙམ་ཇི་ལྟར་ཐོབ་ཐུབ་མིན་སྐོར་དེབ་དང་གཏམ་བཤད་བྱེད་མཁན་མང་པོ་མཐོང་རྒྱུ་ཡོད། སྒོམ་ལ་བརྟེན་ནས་ལུས་སེམས་གཉིས་ལ་ཕན་ཐོགས་དུ་མ་ཞིག་ཡོད་པ་དང་དེར་རྒྱབ་གཉེར་བྱེད་པའི་བརྟག་དཔྱད་ཀྱི་དཔང་རྟགས་མང་པོ་ཞིག་རྙེད་ཡོད།

འོ་ན་སྒོམ་གྱིས་ལུས་ཁམས་ལ་ཕན་ཐོགས་བྱེད་ཚུལ་གང་ལགས་ཞེ་ན། ཐོག་མར་སྒོམ་ལ་བརྟེན་ནས་ང་ཚོའི་ཀླད་པར་འགྱུར་བ་གཏོང་གི་ཡོད། མི་ལྟ་བུའི་ཀླད་པ་ནི་དབང་རྩའི་ཕྲ་ཕུང་ཐེར་འབུམ་བརྒྱ་ལྷག་གིས་གྲུབ་པ་ཞིག་དང་དབང་རྩའི་ཕྲ་ཕུང་དེ་ཚོ་ནི་མཛུབ་མོ་ཁྲི་སྟོང་ཡོད་པའི་ལག་པ་ལྟ་བུ་ཞིག་རེད། དེ་ཡང་ཀླད་པའི་ཕྲ་ཕུང་དེ་དག་གི་སྣེ་མོར་ཡོད་པའི་མཛུབ་མོ་དེ་དག་ཕྲ་ཕུང་གཞན་གྱི་མཛུབ་མོར་སྣེ་འབྲེལ་གྱི་ལམ་ནས་ཕན་ཚུན་གནས་ཚུལ་གཏོང་ལེན་བྱེད་ཀྱི་ཡོད་ལ། ཕྱིའི་ཁོར་ཡུག་གི་སྐུལ་རྐྱེན་དང་ནང་བསམ་བློའི་སྐུལ་རྐྱེན་གྱི་འོག་ཏུ་ཕྲ་ཕུང་དེ་དག་བར་འབྲེལ་ལམ་གསར་པ་སྐྲུན་རིམ་བཞིན་རྙིང་པ་རྣམས་ཞིག་འགྲོ་བ་ཡིན། ཉམས་ཞིབ་མཁན་ཚོས་གནས་སྟངས་འདིར་མྱོང་བ་ལ་བརྟེན་པའི་ཀླད་པའི་མཉེན་ཆ་ཟེར་གྱི་ཡོད། མཉེན་ཆ་ཟེར་བ་ནི་སྐྱང་རྐུམ་བྱེད་པ་སྟེ་མདོར་ན་འགྱུར་ལྡོག་བྱེད་ཐུབ་པའི་དོན་ཡིན། དེར་བརྟེན་སྒོམ་གྱི་ཐོག་ནས་གོམས་འདྲིས་བསྟེན་པ་དེས་སྔར་ཡོད་རྩ་ལམ་ལ་འགྱུར་བ་གཏོང་ཐུབ་པ་དང་སྙིང་རྗེ་དང་བྱམས་པ་ལྟ་བུ་གོམས་འདྲིས་རྒྱུན་རིང་བསྟེན་པ་དེས་སེམས་ཁམས་འདི་རིགས་ལྡོག་ཕྱོགས་ཀྱི་ཆ་རྣམས་ཞི་བའམ་དེ་འབྲེལ་གྱི་རྩ་ལམ་བཅོམ་པར་བྱེད་ཐུབ།

སྒོམ་གྱི་ཐོག་ནས་སེམས་ངལ་དང་། སེམས་རྒོད་པ། ཡིད་མུག ཟ་འཐུང་གི་འཁྲུག་སྐྱོན་དང་དེ་མིན་སེམས་ཁམས་ཀྱི་བྱེད་ལས་མང་པོ་ཞིག་ལ་བཟང་ཕྱོགས་ཀྱི་འགྱུར་བ་གཏོང་ཐུབ་ཀྱི་ཡོད་ལ་འདས་པའི་ལོ་ངོ་བཅུ་ཕྲག་གཅིག་ཙམ་གྱི་ནང་སྒོམ་དང་འབྲེལ་བ་ཡོད་པའི་ཉམས་ཞིབ་ཀྱི་དཔྱད་རྩོམ་སྤེལ་ཚད་ལྡབ་བརྒྱ་ཕྲག་གི་འཕར་ཡོད།

མཆན་ཞོགས།

རྩོམ། RSS | མཆན། RSS

༺ དཔར་སྐྲུན་དག་དབང་། © 2014 www.scienceintibetan.org དྲ་ཚིགས་བཟོ་མཁན། བསོད་ནམས་ཟླ་བ།